Driftskrise for Ådnatun

UVISS LAGNAD: Skrivar Egil Ytrearne (tv) og kasserar John Berg i Arna Sogelag fryktar at Ådnatun Museum må segla sin eigen sjø dersom sogelaget ikkje lenger kan ta på seg ansvaret for drifta.
Foto: Ronny Bertelsen

Utskriftsvennlig versjon Tips en venn om denne saken Tips en venn om denne saken Din e-postadresse:  Mottakers e-postadresse: Din kommentar: Relaterte artikler Ta vare på Ådnatun! Lovar å møta sogelaget

Kasseraren og skrivaren i Arna Sogelag seier til Bygdanytt at 2010 blir eit svært viktig år både for laget og Ådnatun. For sogelaget fordi dei fryktar å måtta seia frå seg ansvaret dei har tatt med museet og bygningsmassen. For museet kan dette igjen tyda forfall, fordi ingen andre ønskjer å ha dette ansvaret.

Trist og tragisk
- Det vil vera både dramatisk, tragisk og trist for sogelaget, museet, bydelen og kommunen dersom ingen tar seg av denne skatten. I sogelaget har vi ingen konservator som kan gjera den museumsjobben som trengst, seier John Berg, kasserar i sogelaget.

I dag meiner sogelaget at det museumsfaglege ansvaret for Ådnatun ligg hos Osterøy Museum, som igjen høyrer til det konsoliderte Museumssenteret i Hordaland. Det store spørsmålet er likevel om dette verkeleg er slik. I samband med konsolideringsplanen for musea i Hordaland var Ådnatun tatt med i avtalen med Osterøy Museum, men i fjor haust fekk sogelaget tilfeldig vita at Ådnatun ikkje lenger var med i konsolideringa. Å vera med her er heilt nødvendig for å få tildelt ressursar.

Fekk ikkje vita
I årsmeldinga til sogelaget går det fram at Ådnatun vart fjerna frå museumsplanen i september 2003. Og etter 1. januar 2007 hadde ikkje Osterøy Museum lenger nokon avtale med Ådnatun.

Egil Ytrearne er fersk som skrivar og styremedlem i sogelaget, og han vart overraska og fekk bakoversveis då han såg alle breva laget hadde sendt utan å få svar.

-Styret har sendt brev til alle dei involverte partane i denne saka, men ikkje mottatt svar. Ikkje før i november i fjor då Osterøy Museum sende eit brev vi ikkje vart særleg mykje klokare av, seier Ytrearne.

Les kva Osterøy museum svarar på kritikken her.

Enormt potensial
- Alt ligg til rette for at drifta av Ådnatun kan bli svært god - og til glede for svært mange. Men nokon må ha drifts- og museumsansvaret. Håpet er at tunet og bygningane kan ha fast opningstid, til dømes ein dag i veka i sommarhalvåret. Tunet har eit enormt potensial, men vi treng fagfolk som kan utnytta dette på beste måte, seier John Berg.

- Kva om det ikkje skjer?

- Enkelt kan ein seia at Arna sogelag låner Ådnatun av Fylkesmannen i Hordaland, ettersom dette var ei stifting som fylkesmannen på visse vilkår oppløyste. Seier vi takk for lånet, må fylkesmannen og fylkeskultursjefen finna andre løysingar som er i tråd med testamentet etter Lars Ådna, seier Berg.

Om eit par veker er det årsmøte i Arna sogelag, som har over 150 medlemmer. Mykje tyder på at Ådnatun Museum vil bli ei sentral sak på møtet.