- Er verken rik eller kristen

IKKJE DYRT: Berit M. Borge likar det ho får høyra av administrasjonsleiar Bernhard Belt ved Danielsen skoler. Ho reagerer ikkje negativt på å måtta betala 9.800 kroner årleg for ein skuleplass.
Foto: Ronny Bertelsen

Utskriftsvennlig versjon Tips en venn om denne saken Tips en venn om denne saken Din e-postadresse:  Mottakers e-postadresse: Din kommentar: Relaterte artikler Foreldre bak planar om ny skule Svært kritisk til privat ungdomsskule «Det er noko som er fundamentalt gale når den som mobbar blir igjen på skulen, medan den som blir mobba til slutt må skifta skule» Berit M. Borge

Medan Tore Eikeland sette kaffien i halsen då han las oppslaget om den planlagde privatdrivne ungdomsskulen på Osterøy, vart heradsstyremedlem Berit Borge kraftig provosert då ho las intervjuet med Eikeland.

9.800 kroner
- Utan å kjenna fakta i saka konkluderer han med at dette er ein skule for velstilte kristne. For det første veit eg at svært mange som står på lista over interesserte ikkje er såkalla personleg kristne. Eg er ein av desse. Rett nok går eg i kyrkja mellom anna når det er dåp, gravferd, bryllaup og konfirmasjon, men eg er ikkje meir religiøs enn folk flest. Eg trur ikkje Eikeland heilt veit kva han snakkar om, seier Borge.

Ho tilbakeviser også på det sterkaste at ein må vera velstilt for å gå på ein privat skule. Administrasjonsleiar Bernhard Belt ved Danielsen skoler opplyser til Bygdanytt at dei i dag tar 9.800 kroner i foreldrebetaling per elev i ungdomsskulen. Dersom ein familie har fleire born på skulen, får dei søskenmoderasjon.

Ikkje velstilt
Borge hevdar at ho slett ikkje er å rekna som velstilt. For det andre meiner ho prisen ikkje er avskrekkande høg.

- Dette tilsvarar ei månadsbetaling på under tusen kroner. I høve til ein kommunal skule som er gratis, blir det ein ekstrakostnad. Men dersom ein skal ha eit barn i barnehage, kostar det nesten tre gonger så mykje. Eg reagerer ikkje negativt på prisen, og for vårt vedkomande handlar dette om å prioritera, presiserer Borge.

Sonen hennar skal byrja på ungdomsskulen til hausten. Difor håpar ho at Osterøy får eit alternativ til den kommunale skulen alt i år. Ho har lite lyst til at sonen skal byrja på ein skule som ho meiner har ei rekkje utfordringar ein må løysa snarast.

Løys problema!
- Eg trur det er velkjent for dei fleste som har, eller har hatt, born på ungdomsskulen at skulen slit med nokre få elevar som øydelegg for svært mange. Hadde alt vore flott på Hatland, hadde desse foreldra neppe tatt initiativet til å starta ein privat skule. Kommuneleiinga, skuleleiinga, foreldra og elevane må ta tak i dette så raskt som mogeleg for å finna gode løysingar. Gjer dei ikkje det, vil det bli svært stor interesse for å gå på ein privat skule på Osterøy, seier Berit Borge.

Som medlem i heradsstyret er ho også skuleeigar. Men ho er ikkje med på at ho no bidrar til å svekka den kommunale ungdomsskulen både økonomisk og fagleg.

Sparer pengar
- Med færre elevar vil ungdomsskulen spara pengar. Ikkje berre det. Den private skulen får 85 prosent av overføringane frå staten per ungdom. Det tyder at for kvar elev som går på ein privat skule, sit kommunen att med over 10.000 kroner. Eg er også overtydd om at det å få ungdomsskulen sine problem opp på overflata vil bidra til å få løyst dei, seier Borge.

Ho håpar foreldra no vil engasjera seg langt sterkare i mobbeproblema og utfordringane skulen har med å halda disiplin.

- Det er noko som er fundamentalt gale når den som mobbar blir igjen på skulen, medan den som blir mobba til slutt må skifta skule, seier Borge.