Heilt som venta

Utskriftsvennlig versjon Tips en venn om denne saken Tips en venn om denne saken Din e-postadresse:  Mottakers e-postadresse: Din kommentar:

Når noko er for godt til å vera sant, så er det som regel det. At månadskortet for tog og buss skulle vera billegare enn tog åleine, var overraskande for mange. Og no ser det dessverre ut til at det berre er dagar igjen før denne prispolitikken er over.

I morgon skal Samferdsleutvalet i Hordaland ta stilling til om prisen på Skyss sitt månadskort for tog og buss skal aukast frå 770 til 830 kroner. Dette vil i så fall vera om lag same prisen som NSB tar for månadskortet mellom Arna og Bergen.

Det er på bakgrunn av eit brev frå NSB at fylkesrådmannen rår politikarane til å gå inn for å auka prisen med om lag åtte prosent.

No kan sikkert både NSB og Skyss argumentera med at dei må dekka inn auka utgifter. Men her har altså først NSB auka prisen på lokaltoget, før Skyss no skrur opp prisen på turen mellom Arna og Bergen. Korleis harmonerer det med målet om å få endå fleire til å bruka offentleg kommunikasjon?

Det er ikkje berre lommeboka til dei reisande som er taparar med ein slik prispolitikk. Den andre taparen er klimaet i Bergen sentrum og dei som bur og jobbar der. Ein får ikkje mindre biltrafikk i bykjerna ved å skru prisane i taket.

For tida forhandlar NSB og fylkeskommunen/Skyss om ei samordning av prisane mellom toget og bussen. Målet er at det skal kosta 25 kroner for reiser innan Bergen kommune uansett kva transportmiddel ein nyttar. Slik felles takstsystem har ein hatt i Oslo lenge, og det har vore etterlyst i Bergen i fleire år.

Vi håpar inderleg at eit slikt samarbeid går i orden. Skal vi få fleire til å reisa kollektivt, må det førast ein heilt annan prispolitikk enn i dag.