Har tilsett to nye
nøkkelpersonar

AUKAR BEMANNINGA: Osterøy-rådmann Odd Ivar Øvregård har tilsett ein assisterande rådmann og ein controller.
Foto: Arkiv

Utskriftsvennlig versjon Tips en venn om denne saken Tips en venn om denne saken Din e-postadresse:  Mottakers e-postadresse: Din kommentar: NESTKOMMANDERANDE: Jarle Landås er tilsett som ny assisterande rådmann i Osterøy kommune, og han byrjar formelt 1. mai. Foto: Privat

Etter at tidlegare assisterande rådmann Trine Grønbech slutta, har denne stillinga stått ledig. Det blir det slutt på frå 3. mai, då Jarle Landås frå Bergen tar plass på sitt nye kontor i rådhuset.

Landås er 41 år gammal og tok juridisk embetseksamen i 1995. Han har i tillegg utdanning innan personalutvikling, leiing og økonomistyring.

Fylkesmannen
Sidan 1999 har han vore tilsett hos Fylkesmannen i Hordaland. Her har han vore tilsynskoordinator/ fagansvarleg for tilsyn mellom anna etter barnevernslova og sosialtenestelova.

Han har også laga og halde kurs for kommunar innan internkontroll og saksbehandling. Før dette var han regionansvarleg for økonomisk rådgjeving/gjeldsrådgjeving på Sør-/Vestlandet. Han har også hatt mange oppdrag for sentrale styresmakter, inkludert utvikling og gjennomføring av kurs for departement, direktorat og tilsyn, også internasjonalt.

Rådmann Odd Ivar Øvregård opplyser at Jarle Landås har opparbeidd seg spisskompetanse innan kommunale styringssystem, og han har også svært god innsikt i dei oppgåvene ein kommune har ansvar for.

Økonomirådgjevar
- Det var fleire godt kvalifiserte søkjarar til den ledige stillinga som assisterande rådmann, og det er vi godt nøgde med. Landås vart innstilt på førsteplass etter ein grundig prosess, og eg glad for at han takka ja til stillinga, seier Øvregård.

Den andre personen rådmannen har tilsett er ein såkalla controller. Han heiter Jostein Furre og byrjar i jobben om berre eit par veker. Han er utdanna siviløkonom frå NHH og jobbar i dag som økonomikonsulent i Bergen kommune.

For dei som er usikre på kva ein controller eigentleg er, kan rådmannen opplysa at vedkomande skal ha ei rekkje roller knytte til økonomi i den kommunale forvaltninga. Alt frå å laga analyser av, og kontrollera økonomien, til å fungera som rådgjevar og støtte for rådmannen og einingane i kommunen.

Gull verd
- Treng ikkje kommunen heller fleire lærarar og sjukepleiarar enn endå fleire i administrasjonen?

- Det vi først og fremst oppnår med denne stillinga er at dei som jobbar til dømes på skulane kan bruka mindre tid på økonomi, som dei kanskje ikkje kan så mykje om, og meir tid på det dei kan mest, undervisa. Opphaveleg skulle stillinga knytast til pleie og omsorg, men no blir dette ein ressursperson for alle einingane, seier Øvregård.

- Det høyrest ut som du er godt nøgd med å ha skaffa deg desse to nytilsette?

- Det er heilt rett. Dei to utfyller kvarandre på ein svært god måte, og eg kjenner meg trygg på at dei vil bidra til at kommunen på sikt kan spara pengar. Det er ikkje så mange kommunar som har ein eigen controller, men eg trur denne stillinga kan bli gull verd for oss, seier Øvregård.

Det var totalt 10-12 personar som søkte på dei to stillingane, dei aller fleste av dei ønskte å bli assisterande rådmann.