Ny økonomisk sjokkrapport

I PENGEKNIPE: Dei store overskridingane på Osterøy-budsjettet i år, kan gjera det vanskeleg å starta nedbetalinga på tidlegare års underskot.
Foto: Arkiv

Utskriftsvennlig versjon Tips en venn om denne saken Tips en venn om denne saken Din e-postadresse:  Mottakers e-postadresse: Din kommentar:

Rådmannen har hatt ein ny gjennomgang av korleis det stod til økonomisk på Osterøy ved utgangen av april, og konklusjonen er at det negative avviket kan passera ti millionar kroner dersom ikkje tiltak blir sette i verk.

Tøffe tiltak
Sjølv om tala ser illevarslande ut i dag, er det viktig å presisera at prognosane er baserte på at drifta blir vidareført utan innstrammingstiltak. Det kjem ikkje til å skje.

Rådmannen varslar at negative avvik på eit budsjettområde i utgangspunktet skal dekkast inn så langt som råd gjennom sparetiltak på same området.

Det er fleire viktige forklaringar på kvifor underskotet blir så stort. Nedbetaling av oppsamla underskot frå tidlegare år er ein budsjettpost som har lege inne lenge, og som difor ikkje er overraskande.

Men det merkast likevel godt for ein fattig kommune å få ei ekstrautgift på 7,5 millionar kroner berre i år på manglande økonomistyring frå tidlegare år.

Sosial og barnevern
Denne budsjettposten kan korkje politikarane eller rådmannen gjera så mykje med. Det dei kan prøva å ta tak i er dei galopperande utgiftene innan barnevern og sosialtenesta.

Utfordringa her er at dei berre i mindre grad kan styra sakstilfanget og dei økonomiske konsekvensane. Både lovverket og rettane folk har styrer store delar av utgiftene på desse områda.

Det negative avviket på 2,4 millionar kroner innan barnevernet skuldast i hovudsak stor auke i talet på meldingar og fleire kompliserte og ressurskrevjande saker. Det har igjen ført til auke i mellom anna dyre institusjonsplassar.

Kan ikkje dekka alt
Sosialtenesta sitt overforbruk på 1,5 millionar kroner i høve budsjettet skuldast mellom anna auka utgifter til livsopphald, husleige og straum.

På kort sikt er det vanskeleg å spara pengar innan barnevernet. Skal budsjettområdet halda ramma, må difor skule, barnehage, vaksenopplæring og kulturskule dekka dette avviket, noko rådmannen slår fast dei neppe vil greia fullt ut.

Målet til rådmannen er difor å dekka avvika i så stor grad som mogeleg. Dei negative konsekvensane vil verta for store dersom han skulle sett i verk større sparetiltak.

Alle må bidra
Det samla avviket innan helse, omsorg og sosial er på heile 4,4 millionar kroner, men rådmannen legg opp til at dette skal reduserast til to millionar.

Også dei budsjettområda som ikkje har avvik må redusera drifta for å bidra mest mogeleg til det samla resultatet.

På den positive sida har både stab/leiing og miljø/teknikk greidd å redusera sine budsjettavvik med fleire hundre tusen kroner kvar.

Tiltaka og målsetjingane skal føra til at underskotet skal ned til vel fem millionar kroner. Då er det ikkje meir att til underskotsdekkinga enn 2,35 millionar. Dermed blir det endå meir å dekka inn dei to komande åra.