Merkeleg prispolitikk

Utskriftsvennlig versjon Tips en venn om denne saken Tips en venn om denne saken Din e-postadresse:  Mottakers e-postadresse: Din kommentar: Det er billegare å koma seg til Bergen for ein som bur på Trengereid enn ein som bur like ved jernbanestasjonen i Indre Arna.

Frå årsskiftet tar NSB 827 kroner for eit månadskort på lokaltoget Arna - Bergen. Det er ein auke på 67 kroner frå desember, noko som utgjer nesten ni prosent. Altså skyhøgt over normal prisstigning.

Dette føyer seg inn i rekkja av tiltak statsbanene gjennomfører for å flå kundane sine. Frå før er det innført gebyr dersom du går på toget utan å ha løyst billett. Ordninga rammar særleg kundar som kjøper enkeltreiser - og som ikkje når toget dersom dei skal stå i kø ved billettmaskina.

Det mest oppsiktsvekkjande med den nye prisen for månadskort er imidlertid ikkje prisauken, men at den berre gjeld dersom du går eller kjører privatbil til stasjonen. Tar du buss og kjøper kombinert månadskort for både buss og tog, får du det for 770 kroner.

Logisk sett skulle ein tru det var dyrare å reisa med to ulike selskap på same turen, men slik er det ikkje. Det er tvert imot billegare å koma seg til Bergen for ein som bur på Trengereid enn ein som bur like ved jernbanestasjonen i Indre Arna.

Vi oppfordrar alle togpassasjerar med månadskort til å fornya det hos busselskapet neste gong, slik at NSB får merka konsekvensane av sin eigen prispolitikk. Det er rett og slett fornuftig at folk kjøper ei vare der ho er rimelegast, og i dette tilfellet er det ikkje hos statsbanene.