Tiltak mot støy

Utskriftsvennlig versjon Tips en venn om denne saken Tips en venn om denne saken Din e-postadresse:  Mottakers e-postadresse: Din kommentar: Dette kan det ikkje vera spesielt vanskeleg å ordna opp i.

Støy frå trailerar held folk i Arnadalen vakne til langt på natt. Nyleg stod Anne Britt Nicolaisen og Turid Bruarøy fram i Bygdanytt og klaga over problema som det nye, store næringsområdet har ført med seg.

Det er først og fremst framandparkering som er eit problem. Bilar som kjører inn på området om kvelden for at sjåføren skal få seg nødvendig kviletid, men som elles ikkje har noko der å gjera. Dei koblar seg ikkje til straum om natta, slik bilar med leveransar til industribedriftene gjer. I staden går traileraggregata - og lagar ein uuthaldeleg støy for dei nærmaste naboane.

Det er klart at dei fleste industrietableringar får konsekvensar for nærmiljøet. Og storutbygginga i Arnadalen, der mellom anna Asko Vest har reist eit gigantisk engroslager, skaper ein enorm auke i tungtransporten. Både tilkjøring og utkjøring av varer fører til auka trafikk, og dermed også støy og forureining.

Men det er altså ikkje dette som er hovudproblemet for naboane Bn har snakka med. Det er sjåførar som tar seg inn på området, og ikkje tar omsyn til at det faktisk er bustader like ved, som gjer tilværet vanskeleg for folk.

Dette kan det ikkje vera spesielt vanskeleg å ordna opp i. Kommunen og tomteselskapet, som har lagt ut næringsarealet, bør snarast sørgja for at denne framandparkeringa opphøyrer. Dette kan f.eks. skje ved skilting. Alternativt må det leggjast til rette for at også desse transportørane kan kobla bilen til straum om natta, slik at naboane får nattesøvnen tilbake.

Verre er det vel ikkje?