Slutt for Nordea

Utskriftsvennlig versjon Tips en venn om denne saken Tips en venn om denne saken Din e-postadresse:  Mottakers e-postadresse: Din kommentar: Relaterte artikler Legg ned i Arna og på Osterøy

I løpet av året vil Nordea leggja ned kontora sine i Lonevåg og Indre Arna. For kundane må det framstå som nokså absurd at eit konsern som betalar ut 2,2 milliardar kroner i bonus til dei tilsette ikkje tar seg råd til å vera tilstades i eit område med nesten 20.000 innbyggjarar.

Men vi er ikkje overraska. Den teknologiske utviklinga har tatt sjumilssteg dei seinare åra, og gjort det lett å utføra både post- og banktenester på internett. Difor har Posten allereie lagt ned alle kontora sine i Arna og Osterøy. No følgjer Nordea etter. Spørsmålet er kor lenge Sparebanken Vest ser det føremålstenleg å bli verande.

E-post har for lengst erstatta dei fleste brevsendingar, og nettbanken har tatt over mykje av det vi før måtte i skranken for å ordna. På nettet kan du både betala rekningar, overføra pengar, opna sparekonto, vera din eigen aksjemeklar og betala ned på bustadlånet. Men ikkje alle greier å følgja med utviklinga like godt. Særleg eldre generasjonar synest framleis det er kjekt å kunna få hjelp frå eit menneske når dei skal i banken.

Det er faktisk mange middelaldrande og eldre som ikkje har datamaskin eingong. Korleis skal desse få utført banktenestene sine i framtida? Vi trur at bankar som ikkje er tilstades i lokalmiljøa lenger, må rekna med å tapa kundar. I alle høve så lenge det finst konkurrentar som villig tar over. Samstundes er dei fleste av oss utruleg lojale mot banken vår. Å flytta kontoar og lån sit langt inne. Men stadig fleire vågar å ta steget.

Med Nordea sitt tilbaketog er ein epoke over i Arna og Osterøy. Når Sparebanken Vest ein gong i framtida finn ut at også dei har for få kundar som møter opp i banklokala, kjem det same til å skje der. Men enn så lenge kan den siste lokalbanken gle seg over å få ein endå større del av marknaden.