Ein fare for lokaldemokratiet

Utskriftsvennlig versjon Tips en venn om denne saken Tips en venn om denne saken Din e-postadresse:  Mottakers e-postadresse: Din kommentar: Relaterte artikler Vil kutta i heradsstyret Også dei minste partia sine meiningar er viktige å få fram.

Framstegspartiet har føreslått at Osterøy heradsstyre skal reduserast frå 27 til 17 representantar. Om noko slikt skulle bli vedtatt, kan det gå sterkt ut over dei minste partia sine sjansar til å påverka politikken i kommunen.

Osterøy har mesteparten av tida hatt 35 politikarar i heradsstyret. Dette blei redusert til 27 for nokre år sidan. Hovudsakleg fordi kommunen skulle spara pengar. No nyttar Frp det same argumentet for å føreta endå kraftigare kutt i lokalpolitikken. Håpet er å spara inn midlar som kan vera med å finansiera gjenopning av den stengte avdelinga på Osterøytunet.

Då saka kom opp i formannskapet, vart det fort klarlagt at framlegget er i strid med kommunelova. Ein kommune med så mange innbyggjarar som Osterøy skal styrast av minimum 19 folkevalde. No blir det opp til heradsstyret sjølv å avgjera om ein skal leggja seg på dette minimumskravet.

Spørsmålet er kva konsekvensane blir dersom reduksjonen skulle bli vedtatt. Økonomisk vil det neppe innebera dei heilt store innsparingane. Sidan alle møta no er lagde til kveldstid, er det svært sjeldan nokon må kjøpast fri frå arbeid. Då står ein att med spart møtegodtgjersle.

Dei summane kommunen kjem til å ta inn på dette, vil ikkje på nokon måte rettferdiggjera den konsentrasjonen av makt som forslaget inneber. I dag har SV og Venstre berre éin folkevald kvar i kommunestyret, medan Sp og KrF har to. Med ein kraftig reduksjon i talet på plassar vil dei to minste partia vera i stor fare for å ryka ut, medan dei andre vil få redusert sin representasjon. Det inneber at det vil sitja fem parti i kommunestyret - i staden for sju.

For lokaldemokratiet vil ei slik endring vera eit stort tilbakesteg. Også dei minste partia sine meiningar er viktige å få fram i den politiske debatten. Innimellom kan det vera at det er deira forslag som får fleirtal. Det norske folkestyret skal vera for alle, ikkje berre for dei som er størst.