Fråværet må ned!

Utskriftsvennlig versjon Tips en venn om denne saken Tips en venn om denne saken Din e-postadresse:  Mottakers e-postadresse: Din kommentar: Skal vi snu utviklinga, må folk merka at det har ein pris å vera borte frå jobb.

Nordmenn blir sjukare og sjukare, og etterspurnaden etter helsetenester er uendeleg. Slik kan det ikkje halda fram. Til slutt blir vi rett og slett for få i arbeid til å driva AS Noreg - og samstundes dekka dei enorme trygdeutgiftene.

Sjukefråværet her i landet er i verdstoppen. Og så lenge det er politisk fleirtal for at sjukelønsordninga ikkje skal rørast, vil det bli svært vanskeleg å snu utviklinga. Sjølv om det no er vedtatt ein ny avtale om inkluderande arbeidsliv, der det blir stilt strengare krav til alle partar, er det vanskeleg å tru at det skal bli så mykje betre enn med den førre avtalen.

Saksfeltet er komplekst, men det er ingen tvil om at det er mange fleire faktorar som resulterer i sjukmelding eller eigenmelding i dag enn tidlegare. Velstandsutviklinga har mellom anna ført med seg ei rekkje livsstilsrelaterte sjukdomar, som stadig fleire av oss blir ramma av. I tillegg kan kvardagsproblema våre utløysa fråvær. Familiekonfliktar, sorg og skilsmisser er opplevingar som gjer at vi gjerne ikkje «orkar» å gå på jobb - utan at dette nødvendigvis er ei god løysing. Å vera saman med andre på ein arbeidsplass, og få tankane bort frå det som er vanskeleg, kan vera minst like god medisin som å gå heime åleine.

Den norske sjukelønsordninga er unik i verdssamanheng. Ho gjev arbeidstakarar 100 prosent lønskompensasjon frå første dag - og stiller ingen krav til mottakarane. Andre forsikringsordningar har gjerne ein eigendel som må betalast når vi krev utbetaling, men den norske «helseforsikringa» kan vi bruka både i tide og utide utan konsekvensar.

Trygdeforskar Kjell Vaage seier til forskning.no at vi har ei sjukelønsordning som manglar sperrer mot misbruk og overforbruk. Og han har sjølvsagt rett. Skal vi snu utviklinga, må folk merka at det har ein pris å vera borte frå jobb. Så lenge vi får like mykje inn på lønskontoen enten vi er på arbeid eller heime på sofaen, er det stor fare for at fråværet vil halda fram med å auka.