Skyhøg straumpris

Vi kan alle venta oss kraftig auke i straumrekningane framover. Energiselskapa varslar rekordhøge prisar som følgje av stort forbruk og lite nedbør. Finansministeren seier likevel nei til å hjelpa husstandar og bedrifter gjennom å setja ned avgiftene.

På Vestlandet har snøen lege i to og ein halv månad, og temperaturen har stort sett vore langt under null. Forbruket av elektrisk kraft blir deretter. Frå heile landet rapporterer ein no om rekordhøg omsetnad av straum. Samstundes blir det mindre og mindre vatn i magasina som følgje av det svært tørre vêret.

Di høgare straumprisen blir, di meir pengar må private og bedrifter punga ut med i forbruksavgift og moms på denne livsviktige vara. Særleg vil det ramma kraftkrevjande industri og familiar med dårleg råd. Ein skulle tru at staten, som har sett i verk ei rekkje tiltak overfor næringslivet i samband med finanskrisa, også ville ha lempa på avgiftene i ein slik situasjon. Men den gong ei. I staden håvar finansminister Sigbjørn Johnsen inn mange ekstra milliardar på den spesielle vinteren.

Det er uetisk at staten skal sko seg på ein situasjon som heilt klart vil bli vanskeleg for svært mange. Ikkje minst burde det vera viktig å få på plass kortsiktige tiltak for å berga industrien frå enorme kostnader.