Skrinlegg Arnadalen!

Utskriftsvennlig versjon Tips en venn om denne saken Tips en venn om denne saken Din e-postadresse:  Mottakers e-postadresse: Din kommentar: No bør politikarane lytta til brukarane, og leggja bort Arna-alternativet!

Ein ting er sikkert: Verken NSB eller andre transportørar ønskjer ein godsterminal i Arna. Dei vil til Flesland. No bør politikarane lytta til brukarane, og leggja bort Arna-alternativet!

Under debattmøtet i Ljoshall måndag fekk dei mange frammøtte klar melding frå dei som skal bruka ein framtidig godsterminal. Dei vil ha samlokalisering med den nye godshamna for bergensområdet. Difor er Arnadalen uaktuell. Problemet er at sterke krefter i Fana kjempar mot å rasera Fleslands-området endå meir. Flyplass, jernbaneterminal og godshamn på ein og same stad, kan få enorme konsekvensar for dei som bur i nærleiken. Dette kan føra til at politikarane vel ei mindre konfliktfylt løysing. Arna er altså framleis i faresona.

I Bygdanytt tysdag tok ostringen Arild Solberg til orde for å plassera godshamna og godsterminalen ved Samnangerfjorden. Han påpeika det som bør vera innlysande for alle: Flesland er ein blindveg. Trailerar som køyrer til Flesland for å lossa eller lasta varer, vil i hovudsak måtta returnera same veg som dei kom. Frå Samnanger vil ein kunna frakta godset vidare i fleire ulike retningar, og ein vil i større grad kunna unngå trafikk gjennom Bergen sentrum. Ei slik løysing vil krevja lange og dyre tunnelar, men er likevel verd å vurdera på nytt.

For Arna er det no viktig å fokusera på det absurde i å velja ei løysing som berre inneber jernbane- og trailerterminal. Skal ein arbeida framtidsretta, må det etablerast ei løysing der skipstrafikken er tatt med. Området i Arnadalen kan nyttast til anna næringsverksemd - i kombinasjon med bustader.

Uansett løysing er det viktig at dei som har fått bandlagt eigedomane sine i over 20 år, no får ei avklaring.