Med naturen som kyrkje

Utskriftsvennlig versjon Tips en venn om denne saken Tips en venn om denne saken Din e-postadresse:  Mottakers e-postadresse: Din kommentar: Finst det ein vakrare stad å gifta seg enn ute i Guds frie natur?

To unge ostringar som gifta seg i tunet til Osterøy museum i vinter, fekk ingen prest til å stå for vigselen. I staden måtte dei finna ein dommarfullmektig som kunne få seremonien i hamn. Årsaka er at det å inngå ekteskap i kyrkja sin regi utandørs berre kan gjennomførast på stader som er godkjente av biskopen.

Det var dåverande biskop Ole D. Hagesæther som sende ut eit rundskriv om saka i 2005. Han laga då ei liste over stader der prestar kan utføra vigsel. Ingen av desse er på Osterøy, og berre ein er i Bergen: Kristkyrkjetomta på Bergenhus.

Sokneprest i Hosanger og Hamre, Inge Sørheim, har gjeve uttrykk for at han er sterkt usamd i denne strenge praksisen. Det var han som måtte seia nei til det unge paret i vinter. Vi reknar med at svært mange andre prestar også ser det uheldige i at det å inngå ekteskap i all hovudsak må skje i kyrkjerommet. For finst det ein vakrare stad å gifta seg enn ute i Guds frie natur? Skaparverket er vel i seg sjølv ein større og vakrare katedral enn noko kyrkjebygg?

Etter vårt syn bør ikkje biskopen leggja seg borti kvar folk skal bli vigsla til ektefolk. Det å inngå ekteskap er ei offentleg handling, men samstundes svært privat. Det ligg ofte lang planlegging bak, og mange ønskjer å gjera dagen spesiell og minnerik.

Dersom nokon vil ha utandørs vigsel, bør det vera opp til paret sjølv og den lokale presten å bli samde om ein stad som eignar seg. Vi kan ikkje sjå nokon grunn til at andre, overordna organ i kyrkja skal leggja seg borti slike val.

Vi vil oppfordra kyrkja til å vera langt rausare overfor vanlege folk sine tankar og ønskje når det gjeld kyrkjelege seremoniar. I denne samanhengen må vel det viktigaste vera at nokon ønskjer å leva saman i ekteskap. Så får heller andre omsyn vika. Rigide reglar som ingen ser poenget med, fører berre til at folk vender kyrkja ryggen - og finn andre løysingar.