Kommunen må bla opp!

Utskriftsvennlig versjon Tips en venn om denne saken Tips en venn om denne saken Din e-postadresse:  Mottakers e-postadresse: Din kommentar: Med bystyret i ryggen bør Lisbeth Iversen no ha all den støtta ho treng for å gå inn i forhandlingane om eit parkeringshus.

Bystyret i Bergen er opptatt av å få orden på parkeringssituasjonen i Ytre Arna sentrum. Måndag måtte byråd Lisbeth Iversen stå skulerett for bystyrepolitikarane og forklara kvifor det ikkje er etablert ei god nok parkeringsløysing før arbeidet med miljøgata startar opp.

Problema i Ytre Arna engasjerer både innbyggjarar og folkevalde. Møtesalen på skulen var fylt til siste stol då bydelsstyret inviterte til møte for ei veke sidan. Frykt for at dei næringsdrivande i sentrum ikkje vil klara seg gjennom anleggsperioden, dersom all parkering i anleggsområdet blir forbode, var det som engasjerte mest. Men også situasjonen etter at miljøgata er ferdig uroar svært mange. Kommunen har nemleg lagt opp til at det berre blir eit fåtal p-plassar att i sentrum samanlikna med i dag.

Byrådet sin strategi; å satsa på at løysinga kjem berre ein annonserer etter ledig parkeringsareal, er mildt sagt ein svært passiv måte å tilnærma seg problemet på. Alle veit at det ikkje finst areal i sentrum som ein kan ta i bruk til parkering utan store investeringar. Og med bystyret i ryggen bør Lisbeth Iversen no ha all den støtta ho treng for å gå inn i forhandlingane om eit parkeringshus. Både byrådet og bystyret må innsjå at det ikkje vil vera mogeleg å etablera ei permanent løysing på parkeringsproblemet utan at kommunen deltar i finansieringa.

Til bystyremøtet i april må byråden få på bordet kva det vil kosta å realisera eit parkeringsanlegg, og kor stor del av denne kostnaden kommunen må ta for at det skal bli noko av. Alternativt kan kommunen kjøpa arealet og sjølv stå for bygging og drift gjennom det kommunale selskapet Bergen Parkering. Uansett må kommunen no gå aktivt inn i ein konstruktiv dialog med partane i saka, og sørgja for at det blir oppnådd eit konkret resultat. Samstundes må ein gjera alt ein kan for at ulempene i anleggsperioden blir så små som mogeleg.

Miljøgata i seg sjølv er eit svært godt tiltak for Ytre Arna. Dersom parkeringsproblema blir løyste på ein rask og effektiv måte, kan staden kanskje få den revitaliseringa som alle håpar på.