Kulturdagane er her!

Utskriftsvennlig versjon Tips en venn om denne saken Tips en venn om denne saken Din e-postadresse:  Mottakers e-postadresse: Din kommentar:

I dag brakar det laus igjen. For 19. gong blir det skipa til kulturdagar i Arna. I løpet av halvanna veke skal det avviklast rundt 60 arrangement i bydelen. Det er berre å ta hatten av for alle dei frivillige som fyller scener, kulturbygg og kyrkjerom med aktivitet.

Kulturarbeid er sosialt, skaper trivsel og byggjer identitet. Både dei som er utøvarar og dei som er publikum har stor glede av tiltaka som blir gjennomførte. I år kan lokale arrangørar by på alt frå gardsbesøk til rockekonsertar og besøk av kjende artistar. Her skulle altså vera noko for ein kvar smak.

Truleg er fleire tusen personar i Arna engasjerte i kulturaktivitetar kvar einaste veke: Frå dei minste som går i barnekor til dei godt vaksne i pensjonistlag eller andre foreiningar. Kulturlivet står sterkt, sjølv om ein har fått hard konkurranse frå både TV og sosiale møtestader på nettet som Facebook og Twitter.

Alle små og store organisasjonar i Arna og Osterøy er med på å gje innbyggjarane ei aktiv fritid - og ei kjensle av å høyra til. Dette er viktig i eit samfunn der stadig fleire bur åleine. Alle treng eit nettverk rundt seg, og ved å dyrka fritidsinteresser saman med andre får ein trivsel og vennskap på kjøpet. Både idrett og kultur kan vera viktige element på vegen til det gode liv.

Innbyggjarane i Bergen er så heldige å bu i ein kommune som satsar aktivt på kulturfronten. Kulturkontora i bydelane gjer ein uvurderleg innsats når det gjeld å støtta opp om lag og organisasjonar, og leggja til rette for eit aktivt kulturliv i dei ulike delane av kommunen. Mange organisasjonseigde kulturbygg får også verdfulle tilskot.

Kulturkontoret for Arna og Åsane er ei drivkraft i arbeidet med kulturdagane. Dét gjev resultat, og gjer dette til ei mønstring Arna kan vera stolt av. No gjenstår det berre at publikum nyttar sjansen til å få med seg dei mange kulturopplevingane som står på programmet dei neste ti dagane.