Staten tar knekken
på kommunane

Utskriftsvennlig versjon Tips en venn om denne saken Tips en venn om denne saken Din e-postadresse:  Mottakers e-postadresse: Din kommentar:

Norske kommunar druknar i byråkrati. Stadig meir ressursar må nyttast på å oppfylla lover, forskrifter, retningsliner og krav framfor å yta tenester til innbyggjarane.

Konsulentselskapet Difi har nyleg levert ein ny rapport til Kommunal- og regionaldepartementet. Den tek føre seg utviklinga av statleg styring på tre område dei siste ti åra: Grunnskule, helse/pleie/omsorg og miljøvern. Kva har skjedd på denne tida? Jau, vi har fått ein sterk auke i statleg regelverk, rapporteringsordningar, handlingsplanar og statlege tilsyn. Enkelte grupper har og fått lovfesta rettar som kommunane skal følgja opp. Resultatet er at kommunane slit med aukande byråkrati og redusert lokalt handlingsrom.

Slik kan det ikkje halda fram. Får ikkje politikarane bukt med denne utviklinga, vil problema og frustrasjonen i kommunal forvaltning berre bli større og større.

Rett som det er proklamerer nye statsrådar at dei skal redusera skjemaveldet, og gjera det lettare for både bedrifter og offentlege etatar å gjera den eigentlege jobben sin. Men det motsette skjer. Stadig nye skjema og krav blir lanserte. For staten er det viktigare at det blir utarbeidd planar og skrive rapportar enn at folk får den hjelpa dei treng.

Det er ikkje rart at skular må leggjast ned og sjukeheimsavdelingar stengjast når lærarar, rektorar og pleie- og omorgsarbeidarar heile tida må bruka meir av tida si på nye reformer og krav. No er det på høg tid at vi set fokus på det viktigaste: Å undervisa borna og ta oss av våre eldre og sjuke.

Kommunal- og regionalminister Liv Signe Navarsete må visa at politikk er meir enn ord. Handling må til for at vi skal kunna ta vare på det kommunale sjølvstyret og utnytta dei lokale ressursane best mogeleg.

Då kan ikkje detaljstyringa frå staten halda fram!