Kroken på døra

Utskriftsvennlig versjon Tips en venn om denne saken Tips en venn om denne saken Din e-postadresse:  Mottakers e-postadresse: Din kommentar: Relaterte artikler — Eg vil beklaga overfor alle at det gjekk slik Osterøy har for alvor fått merka konsekvensane av at Noreg er eit høgkostland.

Håpet om ny produksjon ved Borge Garveri er ute. Dét er ein tragedie for både Borge-familien og dei 69 tilsette på Osterøy som miste arbeidet sitt for ein månad sidan.

Garveriet i Lonevåg har vore i drift i generasjonar, og har spelt ei viktig rolle for sysselsetjinga i kommunen. Når ein så stor arbeidsplass må leggja inn årene, er det eit enormt tap for lokalsamfunnet. Det berører ikkje berre dei tilsette, men også familiane deira.

Osterøy har for alvor fått merka konsekvensane av at Noreg er eit høgkostland. Både når det gjeld løner, avgifter, produksjons- og transportkostnader ligg vi på eit nivå som kan gjera det vanskeleg å konkurrera i ein internasjonal marknad.

Borge Garveri vart offer for både finanskrisa og ei rekkje uheldige omstende som inntraff samstundes. Konkursen var difor ikkje til å unngå. Den usikre økonomiske situasjonen som dei siste vekene har utvikla seg i Europa, har heller ikkje gjort det lettare å få stabla på beina eit nytt driftsgrunnlag. Då både storkunden Louis Vuitton i Frankrike og ein norsk investor sa nei til å bli med på laget, var det kroken på døra for godt.

Dei fleste hadde i det lengste håpa på ei løysing. Ny drift i mindre målestokk enn før ville i alle høve ha gjeve arbeid til ein del av dei tidlegare tilsette. No må både eigarane og kommunen innsjå at ein epoke er over. Det største garveriet i landet er historie.

Tilbake står ein liten hær av industriarbeidarar utan arbeid. Garveriyrket er så spesielt at mykje av kompetansen er vanskeleg å utnytta. Men dyktige arbeidstakarar kan raskt omskolera seg. Og i mange yrke vil arbeidsinnsats og arbeidsmoral vera faktorar som blir vektlagt minst like mykje som formelle kvalifikasjonar.

Etter kvart som det blir fart i næringslivet att, vil fleire kunna få seg jobb. I mellomtida gjeld det å halda motet oppe og utnytta dei sjansane som byr seg.