Jobb til seniorane?

Utskriftsvennlig versjon Tips en venn om denne saken Tips en venn om denne saken Din e-postadresse:  Mottakers e-postadresse: Din kommentar: Den største utfordringa blir å få arbeidsgjevarane til å satsa på eldre arbeidstakarar.

Av alle som vart alderspensjonistar i 2008 var berre 21,8 prosent yrkesaktive det siste året, viser tal frå Statistisk Sentralbyrå. For dei fleste startar overgangen til pensjonisttilværet med uføretrygd eller avtalefesta pensjon (AFP).

Trass i at vi lever stadig lenger, sluttar vi altså tidlegare i yrkeslivet. Dette forlengar tida som pensjonist, og medfører kraftig auke i pensjonskostnadane. Det mest urovekkjande er likevel at så mykje som 40 prosent av den eldre arbeidsstyrken hamnar på uførepensjon. Dét fortel litt om kor vanskeleg det er for mange å oppfylla dagens krav til produktivitet og inntening når ein blir eldre. Dei som slit fysisk eller psykisk på jobben, vel uføretrygd dei siste åra framfor å slita seg heilt ut på arbeidsplassen.

Held utviklinga fram, kan vi få problem med å dekka pensjonsrekninga. Heldigvis har vi eit stort pensjonsfond å ta av, men når dei yrkesaktive blir stadig færre i høve til talet på pensjonistar, vil også dét kunna bli tømt ein dag.

Ute i Europa må land etter land no ta konsekvensen av ein skakkjørt økonomi. Å auka pensjonsalderen er eitt av dei upopulære verkemidla som blir gjennomførte. Fleire må arbeida lenger for å vera med og dekka staten sine utgifter. I Noreg ønskjer styresmaktene å få folk til å arbeida meir gjennom frivillige ordningar. Den nye pensjonsreforma opnar for at du kan ta ut pensjon frå du er 62, og arbeida så mykje du vil ved sida av – utan avkorting. Samstundes aukar pensjonen din for kvart år du går i jobb.

Dette kan vera ei gunstig ordning for svært mange, og særleg for yrkesaktive som elles ville ha hamna på uføretrygd. Å arbeida litt er betre enn utelukkande å vera passiv mottakar av statlege ytingar frå tidleg i 60-åra.

Den største utfordringa blir å få arbeidsgjevarane til å satsa på eldre arbeidstakarar. Mange har erfart at seniorar ofte hamnar lengst nede i søknadsbunken fordi bedriftene heller ønskjer å tilsetja yngre og rimelegare arbeidskraft. Dette er ei utvikling som må snu dersom intensjonane i pensjonsreforma skal oppfyllast.