Bruk motorsaga!

Utskriftsvennlig versjon Tips en venn om denne saken Tips en venn om denne saken Din e-postadresse:  Mottakers e-postadresse: Din kommentar:

No er han her att, den grøne veggen som stengjer for utsyn langs vegane våre. Og han blir kraftigare og meir ugjennomtrengjeleg for kvart år som går. Det er på høg tid det blir sett i verk tiltak for å få bukt med problemet.

Før sette skogeigarane si ære i å halda landskapet ope. No gror det att meir og meir. Der det tidlegare var vakker utsikt, ser vi berre tre. Vi skimtar så vidt den vakre fjorden mellom greinene her og der - og håpar det snart må koma ei opning. Så, før vi får tid til å tenkja ein ny tanke, er vi inne i ein tunnel.

Det er altså dette vi tilbyr turistane som kjem hit for å oppleva det fantastiske Vestlandet med fjordar, fjell og fossar. Landskapet er mange stader imponerande vakkert, men det blir sjeldnare og sjeldnare mogeleg å sjå det. Gjer vi ikkje ein innsats for å betra utsynet langs vegane, kan det ramma turistnæringa hardt. Kven vil vel betala i dyre dommar for å koma til Noreg når det ikkje lenger går an å sjå alt det flotte vi har å by på?

Her må Statens vegvesen ta affære snarast råd. Det er ei skam at landskapet skal gro igjen på denne måten. Det må ikkje bli slik at det berre er der det finst eigne utsiktsplattformer vi kan nyta synet av vestlandsnaturen. Rett nok er slike utbygg gode tiltak, men det er mykje viktigare å setja av pengar til generell landskapspleie langs vegane.

Både staten, kommunane og grunneigarane elles må no ta dette problemet på alvor. Skogrydding er ei viktig oppgåve som altfor mange forsømmer!