Felles gravplass for heile kommunen?

Utskriftsvennlig versjon Tips en venn om denne saken Tips en venn om denne saken Din e-postadresse:  Mottakers e-postadresse: Din kommentar: Det vil kjennast feil for mange å frakta den avlidne og gravfølgjet mange kilometer bort frå kyrkja etter seremonien.

I kommuneplanen for perioden 2010-2022, som Osterøy formannskap no legg ut på høyring, er det føreslege å setja av areal til ein felles gravplass for heile Osterøy. Dét betyr at det i løpet av nokre år kan bli slutt på å gravleggja dei døde i heimsokna.

Å ta farvel med eit familiemedlem er alltid tungt. Å fylgja våre kjære til grava, skaper sterke kjensler. I dag er det fem kyrkjer på Osterøy. Alle med gravplass rundt, eller like i nærleiken. Mange ostringar har både foreldre, besteforeldre, onklar, tanter og andre i slekta liggjande på same kyrkjegard – i den sokna dei budde eller kom frå.

Det vil naturleg nok skapa reaksjonar dersom politikarane går inn for å endra slike langvarige tradisjonar. For det første vil det føra til at pårørande ikkje lenger får ha familiegravene samla på éin stad. Dette vil gjera arbeidet med å stella gravene meir tungvindt. For det andre vil det kjennast feil for mange å frakta den avlidne og gravfølgjet mange kilometer bort frå kyrkja etter seremonien for å føreta jordfestinga. Det kan føra til at kremasjon blir meir vanleg.

Frå ein kommunal synsstad vil det vera eit viktig poeng å få fleire til å velja kremasjon. Ei urnegrav tar mindre plass enn ei kistegrav, og vil difor bli ei rimelegare løysing. I tillegg vil det på sikt vera mindre ressurskrevjande å driva èin gravplass enn fem. Det vil også vera mykje billegare å etablera ein stor, ny minnelund, enn stadig å måtta opparbeida nytt areal rundt om i alle soknene.

Økonomiske motiv står svært sentralt i denne saka. At det faktisk også byrjar å bli vanskeleg å finna eigna areal enkelte stader, speler sjølvsagt også inn, men umogeleg er det ikkje. No blir spørsmålet kva ostringane sjølve meiner. Er det tradisjonane eller kommuneøkonomien som er viktigast?