Karakterar i barneskulen?

Utskriftsvennlig versjon Tips en venn om denne saken Tips en venn om denne saken Din e-postadresse:  Mottakers e-postadresse: Din kommentar:

Er karakterar i barneskulen ein uting, eller eit tiltak som kan få elevane til å strekkja seg lenger enn dei gjer i dag? Blant dei politiske partia er synet delt. Både Høgre og Framstegspartiet ønskjer å innføra karakterar frå 5. klasse, medan dei raudgrøne vil halda fram med noverande ordning - der ein først møter karakterpresset på ungdomssteget.

Det vi veit er at både born og vaksne har godt av at det blir stilt krav til dei. Dersom ingen ventar seg noko av deg, manglar du motivasjon for å gjera ditt beste. Spørsmålet er korleis vi kan stilla krav på best mogeleg måte.

I Sverige er det lagt fram ein rapport som viser at også svake elevar har nytte av karakterar på barnesteget. På 70-talet fjerna Sverige karakterane i barneskulen. Dette førte til at færre born av foreldre med lågare utdanning fullførte vidaregåande. No blir karakterar innført att frå 6. klasse.

Ein ting er alle samde om: Både elev og foreldre treng tilbakemelding om kvar barnet står reint fagleg. Greier barnet å få med seg kunnskapen som skal lærast på kvart klassesteg?

Karakterar er eit svært tydeleg system i så måte. Oppnår du dårlege resultat, har du høve til å leggja inn eit ekstra gir, slik at du kan forbetra deg til neste gong. Andre former for skriftleg tilbakemelding kan og vera tydelege, men likevel bli tatt mindre på alvor. Karaktersystemet møter borna på ungdomsskulen og vidaregåande skule, og det dei oppnår legg grunnlaget for kva dei kan bli seinare i livet. At elevane blir kjende med dette også på mellomsteget, kan gje betre resultat på sikt.

Uansett må vi ikkje vera redde for å stilla krav til borna. Det er det dei skal veksa på.