Veterantog eller sykkelsti?

Utskriftsvennlig versjon Tips en venn om denne saken Tips en venn om denne saken Din e-postadresse:  Mottakers e-postadresse: Din kommentar: Relaterte artikler Byråd vil sykla på togskjener Å fjerna den mest interessante delen av veterantog-traséen, vil gjera bana langt mindre attraktiv.

Byråd Øistein Christoffersen vil stikka kjeppar i hjula for Museet Gamle Vossebanen. Frp-politikaren føreslår å halvera strekninga som veterantoget kjører. Får Christoffersen det som han vil, må togentusiastane i framtida nøya seg med å kjøra lokomotiv og vogner mellom Garnes og Haukeland, medan strekninga vidare til Midttun blir omgjort til sykkelsti.

Vi håpar inderleg at Øistein Christoffersen ikkje har støtte frå resten av byrådet i denne saka. Å leggja ned den mest interessante delen av veterantog-traséen, vil gjera bana langt mindre attraktiv. Det er mellom Haukeland og Midttun vi finn den mest dramatiske naturen, medan første del av strekninga i stor grad er prega av bustader og næringsbygg.

Vi skjønar sjølvsagt behovet for å sikra betre tilhøve for syklistar og fotgjengarar, men at det skal øydeleggja ein av Bergen sine mest særprega turistattraksjonar, er å gå for langt. Då må ein heller sjå etter andre løysingar, sjølv om dei blir dyrare å realisera.

Arbeidet med å rehabilitera og restaurera jernbanespor, stasjonar, vogner og lokomotiv i Arna starta for rundt 30 år sidan. I dag har Museet Gamle Vossebanen nasjonal vernestatus. Medlemmene i Norsk Jernbaneklubb har lagt ned enormt med dugnadsarbeid i prosjektet. Og i fjor vart den store drivkrafta bak tiltaket, Ivar Gubberud, heidra med Bergen kommune sin kulturvernpris for oppbygginga av denne unike attraksjonen; den einaste veteranjernbana i landet som går på hovudspor med damplokomotiv og teakvogner.

Det verkar svært merkeleg at kommunen det eine året rosar prosjektet opp i skyene, for deretter å vilja fjerna mykje av driftsgrunnlaget. Det blir så feil som det går an. I staden for å øydeleggja store og viktige kulturminne, bør byråden gjera det han kan for å oppmuntra til auka innsats blant dei som driv med kulturminnevern.

Syklistane sine interesser må det gå an å ivareta på andre måtar.