Den vanskeleg debatten

Utskriftsvennlig versjon Tips en venn om denne saken Tips en venn om denne saken Din e-postadresse:  Mottakers e-postadresse: Din kommentar:

Bygdanytt har i lengre tid prøvd å få svar på i kva grad den kristne bodskapen pregar undervisninga på Danielsen Ungdomskule Osterøy. Det ønskjer ikkje skulen å svara på, og får medhald i dette frå kunnskapsdepartementet.

Vi meiner likevel at den type spørsmål bør kunna vera ein del av samfunnsdebatten. Dette er viktige etiske og samfunnsmessige spørsmål som ein ikkje skulle trengja å legga lokk over i 2012. Tema som skaping, evolusjon, sex og midtaustenkonflikten har vore diskutert i det offentlege rom i mange generasjonar, og korleis denne undervisninga føregår på private, religiøse skular, meiner vi har offentleg interesse.

Både rektor Laila Eidsheim og ordførar Kari Aakre deler same bekymringa, at debatten rundt desse spørsmåla ikkje vil vera særleg fruktbar.

Med andre ord; spørsmåla er ikkje nødvendigvis så farlege i seg sjølv. Vi trur dei er gode og aktuelle, både for den kristne ungdomsskulen sjølv, for foreldra og mange andre i kommunen, uansett livssyn. Det er kjenslene som blir virvla opp, orda som blir valde og frykta for at ingen eigentleg lyttar til dei andre sine argument, ein er redd for.

Nettdebattane siste tiåret har hardna klimaet, og redsla for personangrep og latterleggjering får nok mange til å halda hovudet lågt. Det er vårt ansvar som avis, og dykkar ansvar som lesarar og debattantar, å motverka denne trenden. Viktige spørsmål fortener spalteplass, om enn dei kjennest ubehaglege. Vi vonar Danielsen Ungdomskule lettar på sløra, at hardbarka ateistar opptrer lyttande og saklege, og at foreldre sjølve er med og lagar takhøgd rundt middagsbordet for diskusjonar om - for å seia det med ordføraren sine ord – noko meir enn varm mat og Mac.