Nye bompengeprosjekt

Utskriftsvennlig versjon Tips en venn om denne saken Tips en venn om denne saken Din e-postadresse:  Mottakers e-postadresse: Din kommentar:

Det står store og dyre vegplanar på ønskjelista til Osterøy kommune. Ny veg gjennom Vesetgjelet har topprioritet, og vil kosta minimum 110 millionar kroner. Ny veg til Bruvik kjem truleg på rundt 200 millionar. I tillegg er det behov for vidare opprusting av vegen til Tysse, særleg av omsyn til næringslivet. Omlegging av vegen gjennom Hosanger sentrum har også stått på høgt på prioriteringslista lenge.

Det er nokså innlysande at Osterøy neppe vil få offentlege midlar til fullfinansiering av alle desse anlegga. Skal ostringane koma med i kampen om kronene, må ein truleg gjera det same som Bergen og mange av nabokommunane: Laga vegpakker som i stor grad blir finansierte med bompengar.

Det er skrikande behov for midlar til nybygging og vedlikehald av vegnettet over heile landet. Etterslepet når det gjeld trafikksikring er også enormt. Dei seinare åra har store nedbørsmengder ført til langt fleire flaumar og ras enn før. Også dette rammar vegnettet og har medført høge kostnader.

Sjølv om trafikantane på Osterøy har påtatt seg hovudfinansieringa av både Osterøybrua, Tirsåstunnelen, Hannisdalslina og Hauge – Lonevåg, er ein langt frå i mål. Vi skulle ønskja at staten kunne pøsa meir av dei enorme bilavgiftene tilbake til bilistane i form av vegutbygging, men innser at dette neppe kjem til å skje i stor nok grad til at det løyser dei formidable oppgåvene på området. Vi står då igjen med den same løysinga på Osterøy som andre stader: Meir bompengar.

Problemet er at det å få godkjent nye bompengeprosjekt tar tid. Går ein ikkje i gang med finansieringsløysinga før alt planarbeidet er ferdig, kan det ta svært mange år før dei store og viktige veganlegga kan startast opp. Det har ikkje ostringane råd til å venta på. Planlegginga av ei eventuell bompengepakke må skje no, slik at ikkje nye nærings- og bustadprosjekt må leggjast på is i mange år.