Kollektivkrise

Utskriftsvennlig versjon Tips en venn om denne saken Tips en venn om denne saken Din e-postadresse:  Mottakers e-postadresse: Din kommentar:

I førre Bygdanytt kunne ein lesa at det nesten ikkje blir rekruttert nye bussjåførar grunna krav om eit rådyrt teorikurs. Tide Buss AS må både i Arna og på Osterøy bruka pensjonistar og kontorfolk som sjåførar.

I Arna ser det likevel ut til å vera størst frustrasjon over arrogansen NSB viser kundane som reiser mellom Arna og Bergen. Tallause krav om å fjerna straffegebyret på 20 kroner og skaffa billettautomatar som fungerer slik dei skal, ser NSB ut til berre å gje blaffen i.

Prisen på heile 33 kroner på den korte strekninga pågår det forhandlingar om for å få ned til einheitstaksten på 24 kroner. Men også her ser NSB ut til å vera svært lite smidige. I skrivande stund er det ikkje kome nokon avtale om prisreduksjon.

At Sigmund Olsnes og Svein Harkestad i førre Bygdanytt luftar tanken om å boikotta NSB og heller ta bussen i håp om å få monopolorganet til å vakna, er kanskje ikkje nokon dårleg ide. Problemet er berre at det ikkje er plass på bussen til alle som reiser mellom Arna og Bergen.

Det veit sjølvsagt også NSB. Og kven gidd bruka nesten fire gonger så lang tid på å koma seg frå Indre Arna til Bergen enn det som er nødvendig, berre for å spara 9 kroner? Dei er det nok ikkje mange av. NSB kunne truleg ha lagt eit par kroner på billettprisen utan å mista ein einaste passasjer. Til det er åtte minutt med tog mellom Arna og Bergen eit altfor godt tilbod.

Men ei rå og kynisk prising av ei teneste NSB har monopol på går ikkje an, og prisen må reduserast til 24 kroner. Fylkeskommunen og kommunen bør bla opp nokre kroner i spleiselaget, der også NSB må vera med. Det NSB tapar i redusert pris på kvar billett, vil dei truleg få tilbake i form av fleire reisande. Det er også bra for miljøet. Eller treng ikkje NSB bry seg om dette poenget?