Alle elevar treng skulebøker!

Utskriftsvennlig versjon Tips en venn om denne saken Tips en venn om denne saken Din e-postadresse:  Mottakers e-postadresse: Din kommentar:

På Osterøy ungdomsskule manglar elevar bøker i ei rekkje fag. Skulen har for få bøker i engelsk, fransk, naturfag og religion/livssyn/etikk. I tillegg opererer ein med for lite bøker på nynorsk. No krev FAU-leiaren og elevrådsleiaren at politikarane må skaffa pengar, slik at det kan kjøpast inn nok undervisningsmateriell.

Det er ikkje vanskeleg å støtta kravet om at alle elevane bør ha sine eigne lærebøker. I eit land som fløymer over av mjølk og honning skal det ikkje vera slik at ein sparer på heilt nødvendige hjelpemiddel til dei som er nasjonen si framtid. Noko er feil med prioriteringane når det kan skje.

Vi lever i eit land der stadig fleire får sine pengar frå det offentlege, medan det blir færre og færre i privat sektor til å skapa verdiane som trengst for å driva alle velferdsordningane. I ein slik situasjon er det viktigare enn nokon gong å leggja til rette for at born og unge kjem inn i eit utdanningssystem der dei kan ta til seg kunnskap. Har vi ein skule der det ikkje er så nøye, lærer vi borna opp til å ta lett på det meste. Det resulterer fort i elevar med for dårleg basiskunnskap, og dårlege haldningar til skule- og yrkesliv.

Som nasjon har vi mykje å læra av dei feilslåtte reformene som er gjennomførte i skuleverket dei siste tiåra. I staden for at elevane er blitt flinkare, har vi fått ein skule der respektløyse, uro og mangel på disiplin har fått fotfeste. No må alt gjerast for å finna ein veg ut av uføret - slik at lærarane igjen kan bruka energien sin på det viktigaste: Å undervisa.

Det vi treng aller minst i ein slik situasjon er at lærarane må nytta verdifull tid på å kopiera opp stoff om ulike emne, fordi det ikkje finst nok bøker til borna. Om skulda for lærebokmangelen ligg hos rådmann og politikarar, eller hos ungdomsskulen sjølv, er underordna. Det viktigaste er at det blir ordna opp i tilhøva, og dét ansvaret ligg til sjuande og sist i heradsstyret.