Har forsterka med fire klassespelarar på ei lita veke

STORSIGNERING: Joachim Solberg (19) har signert for Valestrand Hjellvik. Den spelande backen er rekna som eit av de største fotballtalenta frå Osterøy. Her aksla han våren 2008 trøya til moderklubben på Hatland før han vart henta til Hovding, der han i år har spelt fast på 3. divisjonslaget.
Foto: Arkiv

Utskriftsvennlig versjon Tips en venn om denne saken Tips en venn om denne saken Din e-postadresse:  Mottakers e-postadresse: Din kommentar: KRIGAR: Robuste Mons-Arne Gillesdal (i gult) vil tilføra VHFK fysikk og duellkraft. — Planen er å scora mange mål, seier 19-åringen, som her er i aksjon for moderklubben Eid i 3. divisjon. TILBAKE: Også Kristoffer Bognøy er tilbake på Furubakken. Foto: Arkiv Eg blir litt skuffa om vi ikkje rykker opp med det laget som klubben no har fått stabla på beina. Joachim Solberg, ny VHFK-spelar

- Ja, dersom eg blir samd med Ove´n (Håland, klubbformann, red. anm.) så tar eg ein ny sesong, seier Jo Solberg.

- Og det er gjerne mogeleg å bli?

- Hehe, ja, sjå ikkje bort frå det...

Storfangst
Sist fredag stod jubelen i taket på Valestrand då det vart klart at Kristoffer Bognøy vender nasen heimover etter eitt år i Fana. Måndag kveld skreiv Eid-guten Mons-Arne Totland Gillesdal under på ein treårskontrakt, og eitt døgn seinare følgde Joachim Solberg opp med sin signatur. Sistnemnde er VH-trenar Jo Solberg sin nevø, og kjem til ferjebygda frå Hovding i 3. divisjon. Alle er fødde i 1990, og rekna som store talent.

Den aller største fangsten kan likevel fort visa seg å bli 26-åringen som vart klar for Valestrand Hjellvik i går kveld; Morten Frøland, som har fleire sesongar bak seg i startopppstillinga til den tradisjonsrike Stavanger-klubben Vidar. Etter å ha sett Frøland på trening dei siste vekene er VHFK-trenaren full av lovord om sin nye playmaker.

- Han har fin teknikk, god innsats og ein fin pasningsfot. Han kan fort bli ein publikumsfavoritt på Furubakken med dei kvalitetane, meiner Jo Solberg, og samanliknar 26-åringen med to andre Furubakken-yndlingar; strategen Tom Sivertsen og silkefoten Are Bryhn.

Både trenaren og klubbformann Ove Håland smiler breitt om dagen.

- Vi synest det er veldig gøy at vi får spelarar til å velja oss, og spesielt positivt er det at vi no også får ei gruppe med unge, treningsvillige og ambisiøse stortalent i rekkjene, seier Håland.

-Talent som kan nå langt
Joachim Borge Solberg er oppfostra i Osterøy IL og rekna som eit av dei største talenta på Osterøy. Han gjekk til Hovding hausten 2008, og har i år spelt fast i forsvarsrekkja til kvittrøyene på andre sida av Sørfjorden.

- Joachim er av dei spelarane frå kommunen som kan nå lengst, meiner Jo Solberg.

- Som fotballspelar har eg lyst til å sjå kor langt eg kan nå, seier nykomaren.

Merkelappen frå onkelen lyder:

- God fotballforståiing, utruleg treningsvillig, gir alltid hundre prosent, stålkondis - ein solid forsterkning.

-Spelande back
Før han gjekk til Hovding spelte han mest på kanten for Osterøy. Trenaren vil etter alt å døma behalda han i rolla, men aktar å dra nytte av 19-åringen sine offensive eigenskapar.

- Joachim er ein spelande back. Løpskapasiteten er ein av hans styrker, og vi må sleppa han oppover, seier trenaren.

At nettopp Jo´en er trenar for laget var medverkande til at Joachim valde å skriva kontrakt. Han spelte under onkelen på guttenivå i Osterøy IL - eit år Joachim karakteriserer som «eit av dei gøyaste på fotballbana».

Ein annan grunn var ønsket om korta ned reisetida i kvardagen. 19-åringen avtener for tida verneplikta på Haakonsvern, og med bustad i Lonevåg er det kortare til trening på Furbakken enn Leikvang.

Sist, men ikkje minst ser Joachim Solberg stort potensial i mannskapet til Valestrand Hjellvik.

- Eg blir litt skuffa om vi ikkje rykker opp med det laget som klubben no har fått stabla på beina. Det er eit veldig spennande lag, og eg ser fram til å koma skikkeleg i gang, seier ungguten til Bygdanytt.

-Mange mål er planen
Alt som 16-åring debuterte Mons-Arne Totland Gillesdal på A-laget til Eid i 3. divisjon. Der spelte han fram til han fjor haust byrja på skule i Os. Der var han også del av fotballklubben som i år frårøva Valestrand Hjellvik opprykket til 3. divisjon. Når han no skal visa seg fram på Furubakken forsikrar 19-åringen:

- Eg har ikkje hjartet mitt i Os. Eg er spent og gledar meg til å spela for Valestrand Hjellvik.

På skulen i Os trefte han VHFKs Ole Morten Tysse.

- Det var han som lokka meg med på trening, forklarar Gillesdal, som no bur på Landås.

Under showkampen mellom supportarane og A-laget før årsfesten 14. november spelte 19-åringen for supportarane. Mons-Arne scora også mål, og det er noko han aktar å halda fram med når han akslar den svarte og kvite trøya og alvoret byrjar i 2010.

- Planen er å scora mange mål, seier ungguten som har spiss- og sentral midtbane som sine favorittposisjonar.

-Tilfører oss fysikk
Trenar Jo Solberg ønskjer derimot å bruka tid på å kartleggja kvar nykomaren vil gjera best nytte for seg.

- Mons-Arne har kvalitetar som gjer at han kan brukast fleire plassar på bana, seier Solberg.

Sjølv karakteriserer Eid-guten seg som ein tøff spelartype - ein som jobbar hardt og trør til i duellane.

- Det verkar som han har ein dimensjon i høve til det fysiske, som vil kanskje har mangla litt, påpeikar trenaren.

Med 185 centimeter på strømpelesten og bakgrunn som høgdehoppar, kan han bli eit våpen på dødballar - begge vegar.

- Han vil garantert få prøva seg både på topp og i andre posisjonar. At Mons-Arne er ein spelar som vil bli brukt i løpet av sesongen, er det ingen tvil om, seier Solberg.

Eit halvt lag sterkare
Midtvegs i 2009-sesongen forsterka VHFK med Magnus Opheim og Tom Sivertsen. Medrekna dei fire nysigneringane, vil dei svarte og kvite stilla til seriestart i 2010 med seks fleire solide spelarar enn tilfellet var i april i år.

Sjølv om Torgeir Rud tel på knappane, Øyvind Tysse slit med fotballhelsa og Trygve Nilsen er ønska av Arna-Bjørnar, har ingen så langt blitt stadfesta på veg bort frå Valestrand Hjellvik.

I fjor vart unggutane Glenn Torgersen og Trygve Bru Reigstad innlemma i stallen og gitt speletid i ein alder av 16 år.

- Dette er spelarar vi ønskjer å utvikla vidare, seier Jo Solberg, som no får flytta opp ein ny junior han karakteriserer som «veldig bra» - Simen Kallekleiv.