Slik blir 17. mai-vêret

Gode nyheiter frå meteorologen om 17. mai-vêret.

I fjor var det strålande vêr på 17. mai. Det blir det også i år, skal vi tru Meteorologisk institutt.
Publisert:
Denne artikkelen er over fire år gammel

For ei veke sida frykta meteorologane at vi kunne få regn på 17. mai. No har heldigvis prognosane snudd.

– Det ser eigentleg ganske bra ut. Det blir mykje sol og temperaturar på rundt 13 grader. Det er bra bunadsvêr, fastslår meteorolog Lars Andreas Selberg ved Meteorologisk institutt.

Les også

17. mai-program for Arna og Osterøy 2018

Han legg til at det kan blåse frisk bris utsette stader frå nord eller nordvest og at det kan kome nokre skyar.

– Men sola skin forhåpentlegvis gjennom.

– Kor sikre er desse prognosane no?

– Tidlegare sleit prognosane våre med fronten som vi visste skulle kome, men problemet var når. Dei siste prognosane viser at det kjem ein front tidleg onsdag, så no er det relativt sikkert, svarar Selberg.

Slik blir vêret denne veka

Både måndag og tysdag denne veka byr på flott solskinsvêr og temperaturar over 20 grader. Måndag er det venta at gradestokken vil kunne vise 22 grader.

– Tysdag ser ut til å bli endå litt varmare enn måndag. Eg vil rett og slett kalle det sommar, fortel meteorologen.

Seint tysdag nærmar ein front seg Vestlandet. Det betyr skyar og fare for litt nedbør.

– Men det er snakk om veldig lite nedbør, fortel Selberg.

Onsdag vil vinden auke på, og med fronten kjem det også kaldare luft.

– Det blir ein signifikant forskjell på temperaturane frå tysdag til onsdag. Vi vil nok få over 10 grader, kanskje 13 eller 14 på det meste onsdag, fortel Selberg.

Sommaren kjem til helga

Torsdag blir det som nemnt fint vêr. Også helga som kjem vil by på flotte dagar med mykje solskin og varme.

– Det ser kjempeflott ut! Temperaturane vil stige igjen på fredag. Det blir mykje sol, lite vind og høge temperaturar. Rett og slett sommar, konkluderar meteorologen.

Til helga kan vi vente oss over 20 grader både fredag, laurdag og søndag.

Publisert: