– Hopparane tykkjer det er spennande at dei får sjansen til å delta i Norge Rundt, fortel leiar og trenar, Øystein Glistrup.
I 2018 samla Glistrup ein gjeng for å gjenoppliva den nedlagde hoppbakken.
– Vi var ein gjeng som fann ut at vi måtte gjera noko med det. Hoppbakken var gjengrodd, så vi rydda bakken og laga ei mindre bakke ved sida av den store, fortel trenaren.
Då klubben fekk høyra at Norge Rundt var interessert i gjera opptak av dei unge hopparane, kalla Glistrup inn til trening.
Imponert
Norge Rundt sin programleiar Elin Skaar var svært imponert over det ho såg.
– Det er fantastisk å sjå ein gammal hoppbakke koma til liv igjen. Det er inspirerande å sjå det frivillige arbeidet og motet til desse barna som fryktlause kastar seg utfor bakkane, fortel Skaar.
Ho tok til og med sjansen til å prøva bakkane sjølv, med hjelp frå 10 år gamle Oda.
– Det var ei halsbrekkande oppleving, men utruleg givande, fortel Skaar smilande.
4 til 14 år
Hopparane, som er frå 4 til 14 år, har treningar to gonger i veka. Ifølgje programleiaren uttrykte hopparane at dei tykte det var svært gøy, og dei gler seg til å visa fram sporten sin.
Gullfjell IL står no som eit lysande døme på kva ein kan oppnå med lidenskap og initiativ.
– Vi tykkjer det er kult å visa dette fram for heile Norge, og vi håpar dette kan vera til inspirasjon for fleire, seier Skaar.
Norge Rundt blir vist klokka 19.40 i dag.